भोटेकोशी बाढीमा हराएका व्यक्तिहरूको खोजी अभियानमा सक्रिय १२ वर्षीय बालक विवेक परियार अहिले सामाजिक सञ्जालमा भाइरल भएका छन् ।
लमजुङका विवेकले काठमाडौंको टिचिङ अस्पताल, महाराजगञ्ज परिसरमा भोटेकोशी बाढीपछि हराइरहेका व्यक्तिहरूका फोटो टाँस्दै उनीहरूको खोजीमा सहयोग गरिरहेका छन् । उनको मानवीय प्रयासबारे सामाजिक सञ्जालमा चर्चा बढेसँगै अस्पताल परिसरमा सञ्चारकर्मीको समेत घुइँचो लागेको छ ।
कक्षा ५ मा अध्ययनरत विवेक हाल महेन्द्र राष्ट्र माध्यमिक विद्यालय, बालुवाटारमा पढ्दै आएका छन् । सानै उमेरमा विपद्मा परेका परिवारलाई सहयोग गर्न उनले देखाएको सक्रियता र सामाजिक भावनाको अहिले चौतर्फी प्रशंसा भइरहेको छ ।
हराइरहेका व्यक्तिहरूको खोजीमा आफैं अघि सरेर सहयोग गरिरहेका विवेकको प्रयासले विपद्का बेला मानवीय संवेदना र सामाजिक उत्तरदायित्वको उदाहरण प्रस्तुत गरेको छ ।