उद्योग, वाणिज्य तथा आपूर्तिमन्त्री गौरीकुमारी यादवले पदबाट राजीनामा दिएकी छन्।
मन्त्री यादवले प्रधानमन्त्री बालेन शाहसमक्ष राजीनामा बुझाएको उनका सञ्चार संयोजक कमल चौलागाईंले जानकारी दिएका छन्।
यादवले बुधबार संसदीय समितिको बैठकमा ग्यास उद्योगीहरूलाई लक्षित गर्दै विवादास्पद अभिव्यक्ति दिएपछि उनको राजीनामा आएको हो। उनले काठमाडौं उपत्यकासहित देशका विभिन्न क्षेत्रमा देखिएको खाना पकाउने ग्यासको अभाव उद्योगीहरूका कारण भएको दाबी गर्दै ‘ग्यास उद्योगीको पाता नकसेसम्म’ अभाव सहज नहुने बताएकी थिइन्।
उद्योग समितिको बैठकमा उनले नेपालमा हाल सञ्चालनमा रहेका ५८ वटै ग्यास उद्योगको लाइसेन्स खारेज गर्नुपर्ने धारणा समेत राखेकी थिइन्। ‘देशमा यति धेरै ग्यास उद्योग चाहिँदैन, दुई वटा मात्रै भए पुग्छ’ भन्ने उनको अभिव्यक्ति सार्वजनिक भएपछि ग्यास उद्योगीहरूले आपत्ति जनाएका थिए।
उद्योगीहरूले मन्त्रीको अभिव्यक्तिप्रति प्रधानमन्त्रीसमक्ष समेत ध्यानाकर्षण गराएका थिए। मन्त्रीको अभिव्यक्तिपछि उद्योगी र सरकारबीचको टकराव थप चर्किएको थियो।
यसैबीच काठमाडौं उपत्यकामा खाना पकाउने ग्यासको अभाव चरम अवस्थामा पुगेको छ। उपभोक्ताहरू एउटा सिलिन्डर ग्यासका लागि घण्टौं लाइनमा बस्न बाध्य छन्। ग्यास पाइहाले पनि निर्धारित मूल्यभन्दा बढी रकम तिर्नुपरेको उपभोक्ताको गुनासो छ।
नेपाल आयल निगम र उद्योग मन्त्रालयले नियमित रूपमा ग्यास आयात भइरहेको तथ्यांक सार्वजनिक गर्दै आए पनि बजारमा भने त्यसअनुसार सहज आपूर्ति हुन सकेको छैन। पर्याप्त ग्यास नआउँदा उपभोक्ताले घण्टौं लाइन बसेर पनि सिलिन्डर पाउन नसक्ने अवस्था रहेको छ।
गत भदौ १४ गते कृष्णभिरमा सडक भासिएपछि ग्यास ढुवानीमा थप समस्या आएको थियो। वैकल्पिक मार्गबाट ग्यास आयात भइरहे पनि बजारमा सहज रूपमा वितरण हुन नसक्दा अभाव झन् चर्किएको हो।
नेपालमा हाल सञ्चालनमा रहेका ५८ वटै ग्यास उद्योग निजी क्षेत्रका हुन्। सरकारको स्वामित्वमा ग्यास आयात, भण्डारण तथा वितरणका लागि आफ्नै पूर्वाधारसमेत पर्याप्त छैन। नेपाल आयल निगमको स्वामित्वमा ग्यास बोटलिङ प्लान्ट छैन भने सरकारको २० प्रतिशत स्वामित्व रहेको साल्ट ट्रेडिङ कर्पोरेसनले सीमित मात्रामा ग्यास बिक्री गर्दै आएको छ।
नेपालमा ग्यास ढुवानी गर्ने आफ्नै बुलेटसमेत पर्याप्त छैनन्। निजी ग्यास उद्योगहरू भारतबाट ग्यास आयात गर्दा भारतीय बुलेटमै निर्भर हुनुपर्ने अवस्था रहेको छ।
यस्तो अवस्थामा बजारमा देखिएको ग्यास अभाव समाधान गर्नुपर्ने जिम्मेवारीमा रहेकी मन्त्री यादवले उद्योगीलाई लक्षित गर्दै दिएको अभिव्यक्ति विवादमा परेको थियो। विवाद चर्किएपछि उनले प्रधानमन्त्रीसमक्ष राजीनामा बुझाएकी हुन्।