यस वर्षको मानश्री पुरस्कार बोधिसत्व स्वामी आनन्द अरुणलाई प्रदान गरिने भएको छ । वसुन्धरा–मान प्रज्ञा प्रतिष्ठानको बैठकले स्वामी आनन्द अरुणलाई यस वर्षको मानश्री पुरस्कार प्रदान गर्ने भएको हो ।
नेपाल तथा विश्वका विभिन्न मुलुकमा योग, ध्यान र आध्यात्मिक दर्शन तथा साहित्यको विकास र विस्तारद्वारा नेपाली वाङ्मय तथा सभ्यताको उन्नयनमा महत्वपूर्ण योगदान दिएको प्रतिष्ठानले मूल्यांकन गरेको छ ।
विश्व समुदायमा नेपाली अध्यात्म, दर्शन र सभ्यताको विशिष्ट स्थान, पहिचान तथा सम्मान अभिवृद्धिमा योगदान दिएकाले स्वामी आनन्द अरुणलाई उक्त पुरस्कार प्रदान गर्ने निर्णय गरिएको प्रतिष्ठानका सदस्य–सचिव कृसु क्षेत्रीले जानकारी दिनुभयो ।
विसं २००१ मा जनकपुरमा जन्मिनुभएका आनन्द अरुणका अन्तरयात्रा, सन्तगाथा, सन्तदर्शन र अचम्म जो देखेँ मैले लगायतका पुस्तक प्रकाशित छन् । आनन्द अरुणका पुस्तक अङ्ग्रेजी, हिन्दी, जापानी र रुसी भाषामा समेत अनुदित छन् ।
त्यसैगरी प्रतिष्ठानले यस वर्षको वसुन्धराश्री पुरस्कार वरिष्ठ साहित्यकार लोकेन्द्रबहादुर चन्दलाई प्रदान गर्ने भएको छ । दुवै पुरस्कारको राशि जनही ७५ हजारसहित सम्मानपत्र रहेको छ ।
