नेपाली कांग्रेसका नेता डा. शशांक कोइरालाले पार्टीका वैधानिक सभापति शेरबहादुर देउवा नै रहेको दाबी गरेका छन्।
स्वास्थ्योपचारपछि बिहीबार स्वदेश फर्किएका देउवालाई त्रिभुवन अन्तर्राष्ट्रिय विमानस्थलमा स्वागत गर्न पुगेका कोइरालाले सभापतिको जिम्मेवारीका विषयमा कुनै कानुनी अड्चन वा ‘स्टे अर्डर’ नरहेको बताएका हुन्।
उनले देउवाकै नेतृत्वमा कांग्रेसलाई बलियो बनाउनुपर्नेमा जोड दिँदै पार्टीभित्रको आन्तरिक एकता कायम गर्नुपर्ने बताए। पार्टीबाट बाहिरिएका पक्षलाई पुनः मूलधारमा ल्याउन आफूहरूको प्रयास जारी रहने उनको भनाइ थियो।
संस्थापन पक्षप्रति लक्षित गर्दै कोइरालाले कांग्रेस विभाजित अवस्थामा रहेको टिप्पणी गरे।“सानेपा कांग्रेस छुट्टिएर गएको छ, उनीहरू आउनुपर्ने हो। उनीहरूले अनादर गर्छन्, के गर्छन् उनीहरूको कुरा हो। देउवा पार्टीको सभापति नै हो। अहिले पनि नेपाली कांग्रेसका सभापति शेरबहादुर देउवा नै हो। उहाँ नै सभापति हो। स्टे अर्डर आएको छ कि छैन ? हाम्रो प्रयास एक गर्न रहन्छ,” उनले भने।
कोइरालाले पार्टीभित्र देखिएको असन्तुष्टि संवादमार्फत समाधान गर्नुपर्ने उल्लेख गर्दै ढिलोचाँडो सबै पक्ष एक ठाउँमा आउनुको विकल्प नरहेको बताए।
