विश्व फुटबलको सर्वोच्च निकाय फिफाले विश्वकप र आफ्ना प्रमुख प्रतियोगिताहरूको व्यावसायिक अधिकारको २० प्रतिशत शेयर निजी लगानीकर्ताहरूलाई बेच्ने विवादित योजना रद्द गरेको छ ।
फिफाका अध्यक्ष जियानी इन्फान्टिनोले एक विज्ञप्ति जारी गर्दै चौतर्फी विरोध र विभाजनका कारण यस परियोजनालाई अघि नबढाउने घोषणा गरेका हुन् ।
उनले भनेका छन्, ‘सबै पक्षका धारणा ध्यानपूर्वक सुनेपछि, यो परियोजनाले यस्तो विभाजन सिर्जना गरेको स्पष्ट भयो, जुन हाम्रो मूल उद्देश्यको हितमा छैन । हाम्रो उद्देश्य सधैँ फुटबललाई जोड्नु र सुधार गर्नु हो । त्यसैले यो प्रस्ताव अगाडि बढ्ने छैन ।’
उनले पुरुष तथा महिला विश्वकपसहितका प्रतियोगितामा निजी लगानी भित्र्याउने प्रस्तावको समर्थन गरेबापत सबै २ सय ११ सदस्य राष्ट्रहरूलाई ४ करोड अमेरिकी डलर दिने अफर गरेका थिए । तर युरोपेली फुटबल महासंघ (यूईएफए) ले यो योजना अघि बढे विश्वकप नै बहिष्कार गर्ने चेतावनी दिएपछि इन्फान्टिनो पछि हटेका हुन् ।
यस्तै उत्तर, मध्य अमेरिका र क्यारिबियन क्षेत्रको फुटबल संस्था कन्काकाफ र एसियाली फुटबल महासंघ (एएफसी) ले पनि प्रस्तावको कडा विरोध गरेका थिए ।
विवाद उत्कर्षमा पुगेपछि इन्फान्टिनोका वरिष्ठ सल्लाहकार कार्लोस कोर्डेरोले प्रस्ताव फुटबलको भविष्यका लागि घातक रहेको टिप्पणी गर्दै राजीनामा दिएका थिए ।
आगामी मार्चमा चौथो कार्यकालका लागि अध्यक्षको प्रतिस्पर्धामा उत्रन लागेका ५६ वर्षीय इन्फान्टिनोमाथि यो निर्णयसँगै ठूलो नैतिक र राजनीतिक दबाब परेको छ । उनले अब सबै पक्षलाई समेटेर फुटबलको साझा हितमा काम गर्ने बताएका छन् ।
